Internet of Things – til inspirasjon

Inspirasjonsdagen, som er ein del av emna Geografiske informasjonssystem, AI og IoT: Introduksjon og anvendelse, samla spennande foredragshaldarar frå Agder fylkeskommune, Intoto (selskap som tilbyr sanntidsovervåking, risikostyring og analyse for elve- og kystforhold), Kystverket, Knowit (konsulentselskap innan IT), Glitre Nett og Kartverket.

Fekk innblikk i smarte løysingar

Geir Inge Hausvik og Hallgeir Nilsen er begge emneansvarlege for valemnet på studiet. Dei er imponerte over verksemdene og deira arbeid.

– Gjennom inspirasjonsdagen fekk me innblikk i smarte løysingar innan alt frå vêr og vassovervaking til korleis Agder fylkeskommune investerer i berekraftige løysingar i det nye fylkeshuset. Dette bidreg til å visa breidda i korleis sanntidsdata og sensorar blir brukte i ulike løysingar og i kvardagen, seier Hausvik og Nilsen.

Lærerikt og spennande

Marthe Myrvang Johannessen og Hedda Kjeldby er begge studentar på andre året på bachelor i Informasjonsteknologi (IT)- og informasjonssystem. Dei er tydelege i tilbakemeldinga si.

– Dagen var både lærerik og inspirerande. Det var særleg interessant å høyra korleis verksemdene jobbar med å utvikla smarte løysingar for transport, infrastruktur og offentlege tenester. Eg vart spesielt fascinert av korleis sanntidsdata frå sensorar kan optimalisera avgjerdsprosessar og auka effektiviteten i samfunnet, seier Myrvang Johannessen

Kjeldby trekkjer også fram samarbeidet og interessa mellom ulike verksemder.

– Det var også spennande å observera korleis bedriftene engasjerte seg i kvarandre sitt arbeid, noko som understrekar kor viktig samarbeid og kunnskapsdeling er i IT-bransjen.

Myrvang Johannessen og Kjeldby lyser opp når dei får snakka moglegheitene som ligg i å arbeida med teknologiløysingar.

– IT handlar ikkje berre om koding, det handlar om å skapa smarte og innovative system, seier Myrvang Johannessen.

– Og det er tydeleg at fagfeltet byr på både variasjon og kreativitet, legg Kjeldby til.

Ein suksess

Lars Fredrik Gyland, fylkeskartsjef i Agder, er ikkje i tvil om at dagen har vore ein suksess.

– Ikkje berre har eg fått lov til å dela litt om arbeidet som Kartverket gjer innanfor dette området, men eg har også fått kompetansepåfyll ved å høyra på mellom anna Frode Skjævestad frå Kystverket og Per Oddvar Osland (Glitre Nett) dela meir om teknologiprosjekta deira.