Ambisjonsnivået for 2025 er sett

Det første møtet i år i Plan- og temadatautvalet (PTU) vart gjennomført 4. mars hos Agder fylkeskommune. Den nye leiarduoen består av Øystein Kristensen frå Agder fylkeskommune og Alvilde Tønnesen frå Statsforvaltaren i Agder. Kristensen hadde dette å seia etter møtet:

–Me har ein spennande veg framfor oss. Utvalet har eit viktig oppdrag som må løftast, og det var inspirerande å samla sentrale aktørar med mykje kompetanse og engasjement i eitt rom. Med utgangspunkt i fylkesgeodataplanen og dei behova me ser samfunnet har framover, har me diskutert ambisjonar og aktivitetar for 2025

Temadata og samarbeid i sentrum

Eit hovudtema i møtet var bruken av temadata og korleis desse blir tekne i bruk i planlegging og avgjerdsprosessar. Kommunane står fritt til å velja kva temadata dei vil inkludera i det offentlege kartgrunnlaget sitt (DOK). Det er derfor viktig at dei vurderer bruksområde og korleis dei best kan integrerast i plan- og avgjerdsprosessar.

PTU og beredskapsarbeid

Det vart også diskutert korleis PTU kan bidra til å styrkja beredskapsarbeidet gjennom betre bruk av relevante temadata og kartløysingar.

Mange verktøy finst allereie, men er lite kjende eller vanskeleg tilgjengelege for dei som treng dei.

–Me ser at det skjer mykje bra rundt omkring, men me må bli flinkare til å kopla aktivitetane saman og synleggjera verdien kart har i ulike samanhengar, seier nestleiar Alvilde Tønnessen.

Set kursen for 2025

Utvalet ønskjer å jobba meir konkret framover og planlegg ei fysisk samling seinare i år. Blant aktuelle tema til samlinga vart klimatilpassing, areal- og naturrekneskap, grønstruktur og beredskap trekt fram. Kva som blir tema for den første fysiske samlinga vil me bestemma på neste møte i PTU.

Digitale GIS-lunsjar

Fylkeskommunen i Agder har ein tradisjon for å arrangera digitale GIS-lunsjar (geografisk informasjonssystem) ein gong i månaden. Dette er lågterskeltilbod der offentlege aktørar kan få fagleg påfyll og dela erfaringar med bruk av geografiske data.

Frå og med hausten 2025 vil dei månadlege GIS-lunsjane arrangerast av Plan- og temadatautvalet.

–Me ønskjer å gjera PTU til ein endå tydelegare aktør for utvikling og samarbeid i regionen. Når me samlar innsatsen, får me til meir – og det skal me gjera i 2025, avsluttar Kristensen.